Daga Wakilinmu
Shugaban matasan jam’iyyar PDP na jihar Kogi, Honarabul Yunusa Halidu Zaki ya yi kira ga gwamnatin jihar a karkashin jagorancin gwamna Ahmed Usman Ododo da ta lalubo hanyar da za ta magance matsalar samar da ruwan sha a Lakwaja babban birnin jihar.
An yi kiran ne ta wata sanarwa mai dauke da sa hannun hon.zaki a ranar Alhamis, wanda THEANALYSTNG ta samu a Lokoja.
Ya siffanta samar da ruwan sha da aka dade ana yi tun bayan mulkin APC sama da shekaru 9 a matsayin “ barazana ga rayuwa.
Shugaban matasan PDP ya kara da cewa tsohon gwamna Ibrahim Idris ya gina babban aikin samar da ruwan sha na Lakwaja, wanda ya yi zargin gwamnatin APC ta yi watsi da shi.
Sanarwar ta ce:
“Ina sane da cewa al’ummar Lakwaja da kewaye sun fuskanci matsala wajen samun ruwa, musamman daga ayyukanmu na ruwa da suka ce suna aiki.
Akwai bukatar gwamnatin jiha ta baiwa ‘yan kasa fifiko fiye da kowane abu, musamman samar da ruwan sha.
Tsohon gwamnan jihar Kogi, Alhaji Ibrahim Idris na jam’iyyar PDP ya aza harsashin samar da ruwan sha a Lakwaja domin saukaka karancin ruwa a jihar, amma gwamnatin APC ta yi watsi da shi.
Ina so in yi amfani da wannan kafar domin yin kira ga hukumar da ta damu da ta samo bakin zaren magance matsalar rashin ruwa a Lakwaja da kewaye,” sanarwar ta kammala.
