Daga Musa Tanimu Nasidi
Mai Martaba Maigari Maigarin Lakwaja kuma Shugaban Majalisar Gargajiya ta Karamar Hukumar Lakwaja, Alhaji Ibrahim Gambo Kabir Maikarfi 1V, ya taya al’ummar Musulmin Jihar murnar shiga sabuwar shekarar Musulunci ta 1446.AH.
Maikarfi ya bayyana godiya ga Allah Madaukakin Sarki da Ya ba su damar shaida tare da gudanar da bukukuwan zagayowar ranar Muharam yana yi wa al’ummar Jihar da ‘yan Nijeriya fatan alheri da sabon Kalandar Musulunci mai cike da zaman lafiya da farin ciki da wadata.
Sarkin Lakwajawa, kuma Shugaban sarakuna karamar hukumar Lakwaja, a sakon sabuwar shekara da ya sanya wa hannu a ranar Asabar, ya bukaci al’ummar musulmin jihar da su ci gaba da yin addu’a tare da gudanar da harkokinsu bisa koyarwar Alkur’ani da Hadisi.
Ya bayyana fatansa na ganin cewa nan ba da jimawa za a kawo karshen kalubalen da ke fuskantar kasar baki daya domin gwamnati na yin duk mai yiwuwa bisa ga muradin doka don magance su .
“Akwai bukatar hada karfi da karfe wajen gina kasa wanda ya rataya a kan kishin kasa, Zaman lafiya, ci gaba da kuma wanzuwar zaman lafiya a kasar.” Kabir Maikarfi yace.
Sarkin ya kuma bukaci al’ummar Musulmi da su yi amfani da albarkar da ba su da iyaka da ke tattare da farkon sabon Kalandar Musulunci wajen yi wa kasa da kasa addu’a.
Ya bukaci ‘yan majalisar da su ci gaba da baiwa gwamnati goyon baya a karkashin jagorancin Gwamna Ahmed Usman Ododo da kuma taimakawa jami’an tsaro da bayanan sirri a matsayin abin da ya dace wajen yaki da miyagun laifuka da aikata laifuka a jihar baki daya.
Maimartaba Kabir ya jaddada kudirinsa na ganin an zauna lafiya tare da inganta rayuwar talakawansa a yankinsa.
