Daga wakilin mu
Dakarun sojojin saman Najeriya da aka girke a Durbunde da ke karamar hukumar Takai a jihar Kano sun kama wani babban mai garkuwa da mutane mai suna Isah Abdul mai shekaru 35.
Hakan na kunshe ne a cikin wata sanarwa da Daraktan hulda da jama’a da yada labarai, Air Vice Marshall ya sanya wa hannu.
Sanarwar ta ce an kama mutumin ne a ranar 19 ga watan Fabrairun 2024 a wani aiki na hadin gwiwa, biyo bayan sahihan bayanan sirri kan maboyar fitaccen mai garkuwa da mutane da yaransa wadanda ke da alhakin yin garkuwa da mutane da dama a yankin.
Sanarwar ta kara da cewa:
“Binciken farko ya nuna cewa Isah Abdul da ‘yan kungiyarsa ne suka yi garkuwa da wani Yakubu Ibrahim Tagaho, wanda aka fi sani da “Sarkin Noman Gaya,” a ranar 6 ga Afrilu, 2023, daga gidansa da ke kauyen Tagaho a karamar hukumar Takai.
Sai dai kuma an sako wanda aka kashe bayan wata guda bayan an karbi kudin fansa N30,000,000=00. A watan Disambar 2023, wannan mai laifin ya yi garkuwa da wasu ‘yan uwa mata 2 da wasu 3 a kauye daya ya kuma sake su bayan karbar makudan kudin fansa. Haka kuma yana da alhakin wasu ayyukan garkuwa da mutane saboda yana da alaka mai karfi da wasu sannnan kungiyoyin masu garkuwa da mutane kamar kungiyar Danbul Fulaku da ke gudanar da ayyukansu a karamar hukumar Takai.
A halin yanzu Isah Abdul yana hannun rundunar sojin saman Najeriya, yana ci gaba da bincike, kuma nan ba da jimawa ba za a mika shi ga hukumomin da suka dace domin ci gaba da shari’a.” Sanarwar ta karkare.
