Kungiyar Sufurin Babura ta Najeriya (NMTU) ta Amince da Ododo

Daga Aliyu Abdulwahid

A yayin da ake Shirin zaben gwamnan jihar Kogi da za a yi ranar 11 ga Nuwamba, 2023, kungiyar sufurin babura ta Najeriya reshen jihar Kogi, ta amince da dan takarar jam’iyyar All Progressives Congress (APC) Alhaji Ahmed Usman Ododo da abokin takararsa, Comrade Salifu Oyibo Joel.

Shugaban NMTU na jihar, Kwamared Gimba Ibrahim ya bayyana haka a wata hira da manema labarai a Lakwaja ranar Laraba.

Shugaban ya ce, masu sufurin babura a jihar a karkashin jagorancinsa sun amince da yin aiki tare da hada kai domin samun nasarar Ododo a zabe mai zuwa.

“Saboda haka, ina kira ga duk mahaya okada da su fito su kada kuri’a ga APC a ranar 11 ga Nuwamba 2023,” in ji shi.

A cewarsa, kungiyar sufurin ta fito da kudurin nasu baki daya, wanda ya ce ya samo asali ne daga irin nasarorin da gwamna Yahaya ya samu, musamman a fannin tsaro da samar da ababen more rayuwa.

Kwamared Ibrahim ya bayyana kwarin guiwar cewa zaben Ododo zai jawo karin ayyukan raya kasa ga al’ummar Oworo, mazaba Lakwaja ta Biyu da ma jihar baki daya.

Shi ya sa, “Muna da kwarin guiwa, alfahari da tsayawa tsayin daka tare da Alhaji Ahmed Usman Ododo, dan takararmu na jam’iyyar APC,” in ji shi.